काठमाडौं । नेपाली कांग्रेसको १५औँ महाधिवेशनअन्तर्गत नयाँ नेतृत्व चयनका लागि आज हुने मतदानको समय फेरि सारिएको छ । यसअघि बिहान १० बजेका लागि तय गरिएको मतदान अब दिउँसो १ बजेदेखि सुरु हुने निर्वाचन समितिका सदस्य सचिव राजु कटुवालले जानकारी दिएका छन् ।
मतपत्र छपाइ तथा मतदानको तयारी पूरा गर्न समय लागेकाले मतदान तीन घण्टा पछाडि सारिएको हो। यसअघि भारी वर्षा तथा प्राविधिक कारण देखाउँदै बिहान ७ बजेको समय १० बजे सारिएको थियो।
महाधिवेशनका ७ हजार २५५ प्रतिनिधिले २९७ सदस्यीय केन्द्रीय कार्यसमिति चयनका लागि मतदान गर्नेछन्। सभापतिसहित पदाधिकारी र केन्द्रीय सदस्यका उम्मेदवारको अन्तिम नामावली बुधबार सार्वजनिक भइसकेको छ।
मतदानका लागि काठमाडौंका राष्ट्रिय सभागृह, खुलामञ्च र प्रज्ञा भवनमा सात मतदान केन्द्र तोकिएका छन्। प्रतिनिधिको प्रदेश तथा समूहअनुसार केन्द्र निर्धारण गरिएको निर्वाचन समितिले जनाएको छ।
मतदानअघि प्रतिनिधिको परिचयपत्र र मतदाता नामावली रुजु गरिनेछ भने निर्वाचन आचारसंहिताले निषेध गरेका सामग्री, विशेषगरी मोबाइल फोन, मतदानस्थलमा लैजान रोक लगाइएको छ।
