काठमाडौं । स्वास्थ्य तथा खाद्य स्वच्छतामन्त्री निशा मेहताले अस्पतालको सरसफाइ, शय्या उपलब्धता र बिरामीले उपचारका लागि लामो समय कुर्नुपर्ने समस्यालाई न्यूनीकरण गर्न ६ वटा स्वास्थ्य विज्ञान प्रतिष्ठानका उपकुलपतिसँग कार्यसम्पादन सम्झौता गरेकी छन्।
मन्त्री मेहताले बिहीबार आर्थिक वर्ष २०८३/८४ का लागि चिकित्सा विज्ञान राष्ट्रिय प्रतिष्ठान (न्याम्स), पाटन स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, बीपी कोइराला स्वास्थ्य विज्ञान प्रतिष्ठान, राप्ती स्वास्थ्य विज्ञान प्रतिष्ठान र पोखरा स्वास्थ्य विज्ञान प्रतिष्ठानका उपकुलपतिसँग सम्झौता गरेकी हुन्।
सम्झौताअनुसार अस्पतालमा सरसफाइ र स्वच्छता कायम गर्ने, बिरामीलाई आवश्यकताअनुसार समयमै शय्या उपलब्ध गराउने तथा उपचारका लागि लामो समय कुर्नुपर्ने अवस्था घटाउने विषयलाई प्राथमिकता दिइनेछ। साथै स्वास्थ्यकर्मीले बिरामी र सेवाग्राहीसँग गर्ने व्यवहारलाई सेवामैत्री र जिम्मेवार बनाउनुपर्नेमा मन्त्री मेहताले जोड दिएकी छन्।
उनले बिरामीले सहज रूपमा गुणस्तरीय र सम्मानजनक स्वास्थ्य सेवा पाउने वातावरण बनाउनुपर्ने बताएकी छन्। स्वास्थ्य सेवाको गुणस्तर सुधार, प्रभावकारी सेवा प्रवाह, पारदर्शिता र संस्थागत सुशासन कायम गर्दै अस्पताललाई सेवाग्राहीप्रति थप जवाफदेही बनाउनुपर्ने उनको भनाइ छ। यसैगरी मन्त्रालयका सचिव डा. विकास देवकोटाले पनि आर्थिक वर्ष २०८३/८४ का लागि १९ वटा सङ्घीय अस्पतालका प्रमुखसँग कार्यसम्पादन सम्झौता गरेका छन्।
